火爆

結束四天南投之旅，但在寫下遊記前，我要先舒發一下我這幾天的感受，如不，我會繼續顛落去，雖然我已經好簡略將 D 白痴事情跟接我回家的弟弟訴說過，但為了不想一次又一次爆粗，我決定寫下來就算了。

對住條友仔兩日，真係人都顛，再對多佢一日，就真係要直接送我入青山。 Can’t express my feelings with the word “yiu” but “diu” !!! Well anyways, 我想講的是呢個老表，又老土、又井底、不知所謂之餘、仲要以為自己好 X 勁，頂，放過我啦!

大佬，我黎旅行架，唔係黎做 Model 架! 一張相影兩次，你再浪費多 D 時間好唔好? 你見我鼻敏感，流哂鼻水，黑哂面，你仲要同一個位置影六次，我頂你，我而家機票係唔係唔洗錢先? 你少影幾廿張，我仲可以跑多幾個景點，你用傻瓜機影都話呀，閃一閃又一張，頂，你而家仲要用你所謂幾廿萬台幣既攝影器材，我每一次聽到你要話換鏡頭，我就真係好想一頭撞埋隔離棵樹度!

知唔知我兩日裡面聽得最多係咩? 「來，好，前一點，左邊，左邊，左，右一點點，好，來了，再來一張，噢，太光了 (OR 太暗了) ，再來一次。」 我 DIU !

最頂佢唔住係咩? 你拿住咁 Q 多器材又腳架又咩春，好似好鬼 pro, 咁點解要影幾廿次呀大佬，仲要你揀親既景點我都好唔 LIKE, 我已經話唔影唔影唔影囉!!! 頂，有真花唔影，叫我同 D 假花影? 我去花園街影唔好?

最火都黎埋係咩? 就係上山睇日出，DIU，一早講好山上凍到飛起 (大約只有十度)，你怕凍咪著多幾件衫囉! 唔夠 4a.m 起身，坐成粒鐘車上到最高點睇日出，頂，佢竟然話好凍，唔識影日出，個太陽都未出黎，佢就收哂所有攝影器材，係咁問我走未，我頂你個肺呀，你早講呀，我自己上黎就好啦，而家黎煩 X 住我? 佢仲要問我，你咁聰明戴冷帽手套既? DIU! 雖然太陽未出黎，但全世界都睇到我塊面黑過鑊底。 咁都未算爛呀，佢竟然同我個 friend 講，睇唔到日出係因為個度有座山遮住左，嘩，你個屎忽鬼，唔係因為我厚道，我真係即場當面就踼爆你個 cheap 精啦! 睇唔到日出? 咁山上個五、六十人係度等咩? 等運到呀? 你唔好當我細路女未見過世面唔識野，我坐飛機多過你坐捷運呀!

雖然可能要數夠十宗罪先至判到佢死罪，但上述個兩樣野我已經好想當場問斬佢。 大佬，我同你一 D 都唔熟，沿途傾下計無咁冷場我明白，我都好歡迎天南地北咁傾，但有 D 私人問題，你見人地唔想答/唔答，仲有無意思一直要追問落去呢? 成熟少少好唔好? 問到我又黑哂面，你覺得好過癮咩? 一 D 都唔識趣之餘仲要覺得自己無問題。

男女有別，我已經好避諱，點解你係都要睇住我執行李? 你個腦究竟有無問題? 我都已經行開一二邊，你係要坐係我個行李隔離做咩? 有咩春好望? 洗唔洗拎哂 D under 俾你睇? 睇睇睇，因住睇爛你對眼呀，痴媽根!

仲有呀，我黎四日咋，時間對我黎講真係好寶貴，你為左好想去個間十億古堡食下午茶，要我等 3 個鐘頭? 你有無問題呀? 好彩我都唔係大蠢材任你擺佈。 係香港要我等位等半粒鐘我都唔會等啦，一早戇居居由 10.30a.m 等到 1.30p.m? 你究竟痴邊條線? 仲要話呢次唔食，第日無咁既機會? 如果我聽你講，我真係唔止痴線，係連根都痴埋。

我都唔知係咪最近比較夜瞓，肝火盛，真係忟憎到爆炸!!! 我跟弟弟在車上說完一次後，我便問他「你話佢係咪好 Q 煩?」。

他竟然一邊笑一邊說「我都覺得你好煩。」。 頂你......

踏入家門，就俾老豆轟炸，妖! 本來我已經有 D 火，你仲淋火水，我同你一樣，都係想自己阿媽好，但你而家為左你阿媽就犧牲我阿媽，咁你話我火唔火先? 我一邊同阿媽講電話，一邊鬧爆你，你估我又好過咩? 大佬，有無可能咁樣逼迫個三個女人去犧牲自己的家庭、生活和健康，廿四小時輪班去照顧一個垂死的老人? 我頂，你唔 make sense 之餘，仲好 Q 自私!!! 妖! 唔寫啦，寫到電腦都想打爆埋!

雖然話唔寫，但係都要寫埋呢樣，老豆應該都知自己衰左，今天一早，就在廚房炒最拿手的鼓油蛋給我做早餐，但我都係有少少燶面，不要以為一份鼓油蛋就可以讓我收聲，你一日唔放阿媽落黎，我就日日唱衰你，唱到全台灣都知!