未踏足雲南之前, 一直覺得呢個省係非常窮困 & 鄉下既地方, 連帶同事們都問我係咪去做義工, 再三叮囑要多帶乾糧....但呢個地方完全係出乎我意料之外, 唔係親眼睇到, 真係唔相信現今中國大陸仍有一個咁古色古香既麗江古城, 靚唔在講, 且好繁榮, 不過可惜既係, 當你置身其中既時候, 濃厚既商業味令到整個古城頓時失色; 被西方人捧到只有天上有既香格里拉並無預期咁靚, 或許呢個地方唔係我心目中既香格里拉; 世外桃源, 應該就只剩下神秘既女兒國, 趁佢未被城市人污染之前, 呢個地方係值得一去, 就算要你花上來回 14 個小時顛簸既車程......
2009.05.23 第 1 日
一早坐火車上琛圳再轉車到琛圳機場, 約個半小時後, 抵達昆明市機場, Plan A, B & C 全部失敗, 我地唯有買第二日7a.m機票去麗江, 行出去機場賓館放低行李就到昆明市中心最旺既金馬碧雞坊走走, 呢個所謂最熱鬧既地方, 真係同我地城市人 '熱鬧' 既定義相差太遠, 感覺就置身於高雄一樣。 走到超市格價, 又一個貧富懸殊既地方...晚餐草草了事, 就返酒店 ZZZZ。
2009.05.24 第 2 日
4a.m 起身, 5a.m抵達昆明機場, 發現未開門…=.=" 真係吹脹, 又係佢地千叮萬囑我地 5a.m要到機場辦理手續~~~ 只可以話大家既做事方式實在太不同。 約 8a.m 到達麗江, 機場小得可憐之餘, 發現當地人做事總係板著臉, 無論係空中服務員又或者係機場工作既, 都係黑口黑面, 又或者係佢地未瞓醒。
乘坐機場巴士到市中心, 認識了由來自西安旅遊既朋友, 之後一起轉車到麗江古城, 進入古城後, 不斷有人拉我地去睇客棧, 基於朋友水土不服, 我地決定係其中一間潤東客棧落腳。
經客棧老闆娘介紹, 我地向拉市海出發, 約 30 分鐘車程, 到達一個郊外, 我地 4人商議之後, 決定騎馬遊茶馬古道 + 拉市海。第一次騎馬, 好開心, 心情亦較之前騎駱駝輕鬆, 起碼佢地無咁高同埋無咁臭, 揀左隻叫小白既馬, 初時唸住佢全身白色, 咁鬼靚, 梗係揀佢啦 之後就知味道…佢又頑皮, 又為食, 仲自己帶住我周圍走, 唔怪得朋友們都唔要佢~
而拉市海就麻麻地, 滿地牛屎同埋成地都係細細隻既青蛙跳黎跳去, 恐怖到爆….
2009.05.25 第 3 日
晚餐過後, 就去當地摩梭人既晚會, 感覺真的不太好, 逗留半小時後, 就離開外出睇星星, 真係好靚同埋好多好多星星, 之後就返回牧雲山庄 ZZZZ。 (雖然酒店不錯, 但始終係鄉下地方又近湖邊, 勁多烏蠅同蚊, 不過好奇怪, 佢地係淨 "嬲"住我地同張床, 唔 "嬲" 食物, 唔知係咪我地瞓左佢地張床~)
2009.05.26 第 4 日
6.15a.m 起床食過早餐後就去摩梭人家訪, 雖然我地只係去左一家之主外祖母既房間, 但係已經感受到旅遊業為佢地帶來既富裕生活, 佢間房既電視同埋雪櫃大到.........真係好誇張~ 之後我地就去左遊湖, 男團友們, 你地真係好差勁~~~ 點解可以咁樣划船, 無反船真係不幸之中既大幸~ 上岸後我地就開始 "行山", 係原始叢林裡走黎走去係呢個 trip 預料不到, 仲好玩過遊湖。
由里格村去到落水村, 同一個湖, 睇到既係不同景色, 落水呢邊更加商業化, D客棧大到成間酒店咁, 真係唔可以睇少鄉下地方既接待能力。 2 日 1 夜既瀘沽湖之旅眨下眼就結束, 返回麗江後就直接去另一個古鎮 - 束河, 束河其實就好似麗江古城既縮細寧靜版, 找了好幾間客棧, 都不合眼緣, 搵到腳都軟之時, 一間客棧既庭園吸引左我投宿.....不幸既事情就咁開始左..放低行李之後, 就外出晚餐, 一行出房就見到一隻超級兇狠既大狗被困於 2 樓。 點解?? 點解我一入黎個時見唔到呢隻野? 吃了一頓不錯既晚餐後, 就返回客棧, 我地 3 個人係門口已經見到個隻龐然大物, 佢一見到我地就邊咆哮邊衝埋黎, 同狗狗有開接觸既 G 都即時退開, 反應遲鈍既我只懂尖叫同企左係度 (原來真係可以嚇到唔識走開), 個一刻我覺得佢真係會咬死我, 但唔知點解, 佢突然又轉移目標撲向 T 個邊, 係呢個時候個白痴主人終於走黎叫住隻野, 如果唔係真係會發生血案~ :'( wah wah wah wah 真係好驚...... :'(
2009.05.27 第 5 日
一覺瞓到早上 8 點幾, 係黎到雲南後最好瞓既一晚。係街邊食過 "早餐"後, 就繞住古鎮行一個圈再到九鼎龍潭觀光, 早上遊人不多既關係, 一路上都好舒服, 終於感受到束河既舒適同寧靜。 約中午時份, 我地就返回最愛既麗江古城。 再一次搵客棧, 唔知係我地挑剔左, 定係瀘沽湖既豪華縱壞左我地, 搵客棧呢項任務變得好艱鉅, 其實我地既要求只不過係要有坐廁, 浴 / 企缸要有門, 唔要有兇猛既看門狗, 要便宜但唔可以太簡陋 ha ha ha 最後我地落腳於古苑客棧, 吃過午餐後就到木府遊覽最富有人家既屋企。 好少中國大陸既古蹟係可以俾你任行任睇而又無人看守, 所以呢度係都幾值得去 (因為我地用左學生証, 半票入場, 要俾全票的話就....貴左 D 啦...)
欣賞過咁靚既府第後我地就向萬古樓方向出法, 本來係唸住去睇日落, 但係實在太熱太累既關係, 我地係萬古樓附近搵左間比較高既客棧坐低飽覽整個古城既風光, 係呢度仲可以遠望玉龍雪山 & 象山, Rmb 2 既 hea 費都係值得俾~ 2009.05.28 第 6 日
6.30a.m 一早起身出發到香格里拉, 基於前 2 日既瀘沽湖內地團都不錯既關係, 我地又 join 多一次, 不過今次真的極之失望 (下刪 1000 字, 我地既不滿已表達在意見書上)。
沿途經過了長江第一灣 (都唔知有咩好睇), 午餐後就到虎跳峽, 之前睇好多人既 blog 都話呢個虎跳峽幾咁壯觀, D 水幾咁澎湃, 對於我黎講, 就係幾舊大石 & 好多水…好多地方既景色都特別過佢, 可能係因為內陸地方 D 人無咩見過水, 呢度就被捧得天花龍鳳。睇完成個景區之後, 係烈日當空下, 徙步上千級石級個種滋味真係好難受, 踏足最後一級時, 真係粗口都黎埋呀!!! 坐多 2 個小時車就到達香格里拉既納帕海, 呢個係一個季節性既湖, (其實我仍然覺得好怪, 一片咁大既草原點可以完全俾水 cover 哂.....??!?!! 即係個湖平時無魚 or 變成草地既時候 D 魚死哂?? 而變成湖既時候, 就淹沒哂 D 草, D 馬同牛就要去第二度食草?? 唔明...只可以話太神奇) 好可惜, 我地去既季節時係一大片草原, 而且仲要係佈滿牛屎 & 屎既草原, OH, 仲要加上成千上萬既蚱蜢係草地上跳黎跳去...
欣賞完精彩既表演後, 就黎到整日既高潮 - 返酒店, 呢間咁既野係我住咁多酒店/賓館/客棧最差最恐怖最嘔心既一間野!!! 一開房門, 房中又有 2 間房, 但係一間開唔到燈, 一間就無左個門把, 我地即刻拎電筒出黎睇下間房有咩, 感覺好似去鬼屋探險咁~ 只見其中一間房放左好多紙巾同綿被係地上, 另一間就有一張床同一盞燈係地…再望下房中地毯, 除了污穢外, 仲有類似血跡一達達, 成個兇案現場咁。去到洗手間, 天呀, 4面牆同地下都好似滲水咁, 濕漉漉, 見到咁既情景, 大叫左一句, 我要返麗江呀~~~~~
2009.05.29 第 7 日
5.15a.m 起身, 食過早餐後 就出發普達措國家公園, 雖然天色不太晴朗, 周圍很大霧, 但仍可以欣賞到屬都湖同碧塔海既景色, 已經好滿足~
呢 2 個地方算係香格里拉唯一可取既景點, 環景幽雅加上清新既空氣, 絕對係行山既一個好地方, 不經不覺我地沿湖行左 7km 就咁樣結束了香格里拉之旅! Yeah 終於返麗江~ 返到客棧再匆匆到古城 shopping~ 雖然下著毛毛細雨, 亦無損購物既意欲~~~2009.05.30 第 8 日& 2009.05.31 第 9 日
睡至差不多 9a.m, 懶洋洋咁起身, 因為今日既行程會係古城 hea….好多人都話到古城最好就係坐係客棧對住小橋流水發呆/睇書 / 談天說地。 加上下雨天, 我地食過早餐後就返回客棧 hea, hea 完又外出 shopping + 食 lunch, 再 hea......
記得第一天來到古城, 大街小巷對我地來說差不多一模一樣, 成個迷宮咁, 但經過多日來既行上行落, 終於摸熟哂 D 路, 東南西北都走到熟哂~~~
晚餐過後, 我地就坐臥鋪車返回昆明, 第一次坐臥鋪車, 感覺比我想像中良好,車廂有 3 排床, 分上下格, 每排約有 7 張床, 有少許畏高既關係, 我真係瞓唔到上格床, 總覺得開車時係會趺落黎~
8.30p.m 開車, 約 4.45a.m到達, 司機讓我地睡至 6a.m才起床, 跳上的士, 叫的士司機車我地去一間唔太貴又近機場同市中心既酒店, 因為係車上睡得並不太好既關係, 再加上連日奔波, 沖左個好舒服既熱水涼後就眠一眠~~
之後我地就出去逛一逛, 跟下雨天既高雄一樣。昆明呢個城市給我只有頹廢既感覺, 好不容易搵到一間小店坐下來, 食左一碗牛肉面, 10隻小籠包, 8隻香菇包, 共 Rmb13, 好味到暈~~ 再逛一逛, 實在太大雨 & 無野睇既關係, 我地又返左酒店 ZZZ 。
約 6p.m check out, 唸住坐的士到機場, 但係差不多等了半小時, 所有的士不是已載有乘客就是不願意去機場, 幸好讓我們看見附近有到機場既巴士站, 我們就用了 Rmb1 感受下昆明既公車, 約 15 分鐘車程就到達機場了, 返到屋企已經係 1a.m, 9 天既旅程就此劃上句號。
係大陸旅行, 學生證絕對係必備, 去到某些貴又唔知好唔好睇既景點, 如不好好利用學生證係不道德的 (註: 我並沒有用過期學生證, 所以唔係呃人 )
大草原係用黎遠望, 唔係要黎行, 亦唔係好似細個睇卡通片咁可以俾你任跑, 因為當你連行路既時候都要低頭睇下會唔會踩屎, 又點可以暢快地跑?
大部分既內地人真係好無禮貌, 咩都要爭, 惟獨要做野既時候就會讓俾你做~
雖然我 D普通話真係好普通, 但係未至於被當面話 "好爛", 單係呢一點, 內地人應該向台灣同胞好好學習!!!
古城治安實在好得很, 沒有琛圳廣州那般危險, 就算一個人自助遊都可以好安全。 而呢度既客棧真係好特別, 絕對古裝片 feel, 我地去既時候屬於淡季, Rmb50 - Rmb 80 既 2 - 3人房間多的是, Rmb100 - Rmb150既房間已經唔錯, 我地見過一間 Rmb880 既客棧, 豪華得太過份, 滿城都是背包友, 真係唔知咩人會去住?
至於食方面, 雲南既過橋米線, 木氏烤魚, 納西烤魚, 麗江粑粑, 東巴田螺真係幾好味, 而我最愛既就係 strawberry~~~~~~ 超甜仲要超便宜, 真係日日食都唔厭, 最重要佢抗氧化~~~~~~ 但係好多街頭小食我都食唔慣, 什麼粍牛大串 (勁辣), 燕窩糕 (無味), 雞豆涼粉 (食唔哂拎俾狗仔都唔食呀陰公), 雲南十八怪 (好難食既糕點) etc 都麻麻地….
去過雲南後發覺自己很孤陋寡聞, 到現在才知道呢個世界仲有人用東巴文, 現今唯一在用既象型文字, 睇見佢地 "畫" 呢 D 公仔用作文字, 真係覺得好得意~
以前細細個成日聽姑姐背背包去旅行, 搵唔到住既地方要瞓街個 D 故仔, 細個聽既時候覺得好有型, 而家真係唔好攪我, 一張舒適既床同文明既洗手間真係好重要 。 今次第一次背背包, 仲要係中國大陸自由行, 雖無想像中咁型, 但得到既係一個寶貴既經驗。
