泰國 - 曼谷、芭提雅 5 天之旅

2008.08.09 - 2008.08.13

Pattaya + Bangkok...好唔掂....

今次既旅程真係一波三折, 個幾月之前 book 好既布吉, 航班突然取消, 臨時改去曼谷, 超失望, 雖然要計劃過所有野, 不過算啦....點知去到真係...wah, 呢個地方真係好唔掂~~~~~

2008.08.09  第 1 日

坐 8.10a.m 既機去曼谷, 超睏瞓咁出發, 一去到機場, 我問友人 G, "我地係邊???" 原來的士司機竟然車左我地去 Terminal 2.........要拖住疲累既身軀行番去平時熟悉既 Terminal 1, OH!  食完早餐, 竟然有人 upgrade 左我地 4 個去 biz class, 多謝友人 J 既"犧牲" !  10a.m 到達曼谷機場 , 之後就搵車出 Pattaya, 開車後10 min, 司機無啦啦叫人落車 =.=".....原來要轉車轉司機, 佢地判上判既做法...真係好嚇人, 因為咁樣, 1.5 hrs 車程我都唔想瞓, 不過最後好安全咁到達酒店, 臨落車之前, 友人 J 用佢好流利既泰文 (只限用於數字上) 同司機議價叫佢第 4 日接番我地出曼谷, 但係......

Lunch 我地行左去 Big C & Central Festival Pattaya 食泰國野, 抵 & 好好味; 去 supermarket 買零食; 返酒店泳池 "玩水" ; 坐兩排車到 "夢亞萊" 食海鮮, 又係好抵 & 好好味 (條魚好美味啊)

泰國天氣一D 都唔熱, 雖然我地坐室外, 但係都有風, 係香港的話, 一早熱死左; 食飽飽又去番之前個 mall 行街街 ; 沿路返酒店經過 D 玩 pool 既地方, 又玩左一陣, 有人好勁呀, 不過就俾人笑佢鍾意係呢 D 地方玩 lor ~

最滿意係酒店!!!

2008.08.10 第 2 日

6.45a.m 食早餐, 7.30a.m 上車出發到 Royang, 瞓到隻豬咁........再坐船出海到 Samed Island, 明明就已經見到個島, 繞左大半個圈都唔埋岸, 真係火都黎埋 ~ 原來有成 16 個灘.....我地俾安排去左個...無咩野玩既灘, 而落船既方式都好嚇人, 因為無碼頭既關係, 大家係海中心, 由船上落到一個類似木板咁既野, 無扶手, 就咁坐係度, 坐連企差唔多有 3x 個人, 唔單止好似難民, 仲似東華籌款, D 人係咁湧上黎, 坐係個木板邊真係好驚趺落海....之後一隻隻濕哂咁到達沙灘, =.=" 起碼, 又係安全到步, 太特別, 我要好好咁記住~~~

玩水 & lunch (好難食) & 玩水 again & 暴哂 -> 黑左, 個沙灘真係幾靚, 不過 D 海水無想像中咁清, 呢個島係時候要俾淘汰啦~~ 回程繼續 ZZZZZZ, 返酒店梳洗之後, 就出發到 "頌塞" 食晚餐 (放火燒雞) 好好味~ 之後就去 Tiffany 睇人妖 show, 真係靚爆鏡啊, 睇完之後大家當然要發表下自己既心水啦~~ hor hor hor..

2008.08.11 第 3 日

食完早餐, 9a.m 出發去玩 ATV, 一開始條路又彎又窄, 係咁撞埋去 D 樹, 都唔知做咩鬼 ~~~ 炒左幾次, 終於都順暢左 D ha ha ha ... 玩左半個鍾, 大家變得好污糟 ~ 之後團友們就去左玩射擊, 真係有姿勢有實際 wor ~ 然後就去笨豬跳, 一去到, 見到咁高, 當然要打退堂鼓啦 ~ 勇敢既友人由報名到跳落黎都係短短 15 分鐘, wah wah 左兩下, 就見到有個人係半空彈黎彈去 hahaha....

為左鎮定友人既情緒, 就去左 McD 飲D野, 佢地既 McD 係貴過我地 ga ~~ 之後係 Royal Garden Plaza 行街街 & lunch @ Subway ; 再到 Mike Shopping Centre 行街街, 好鬼攰返酒店 hea, 我就繼續 ZZZ, 有人就係咁睇奧運, 另外兩個就當然繼續用流利既普通話交流~~ 之後我地就去左 Walking Street, 真係撞鬼, 以為係好似夜市咁既野, 點知完全唔係個回事??? 因為落雨既關係, 我地就求期去左一間餐廳食晚餐, 然後就分道揚鑣, 睇泰拳既去睇泰拳, shopping 既繼續返去 D malls shopping ~

2008.08.12 第 4 日

食完早餐, 10a.m 等第一日車我地既司機黎接我地, 點知佢派左佢 "老豆" 黎接我地, 突然坐地起價 & 仲要唔識路, 當然我地就即刻搵第二個司機, 不過, 真係好討厭, 佢地今次判上判再判出去, 轉左兩次車 & 司機, 攪到成件事都好煩 結果, 我地俾預期遲左去到曼谷, check-in 後就到 Lee Cafe 食 lunch (個芒果糯米飯好美味), 之後我地一直行....行....行左 2 個地鐵站去到 National Stadium, 之後又分道揚鑣, 我跟友人就去 MBK Centre & Siam Discovery Centre 行街街; 再會合於 Siam Centre; Supper @ Sizzler (好大份, 不過大家都食得哂 ); 最後 Siam Paragon & Central World 再行街街 & 在 Big C 買野食; 終於行完返酒店 ZZZ

2008.08.13 第 5 日

一早食完早餐就立即去 Amarin Plaza 買手信, 因為友人們前一日收穫並不豐富既關係, 佢地決定係最後一日繼續努力, 不過有兩個人睇黎唔係咁鍾意講價 lor ~ 我同台灣朋友真係睇唔過眼 D 有$人既所為, 惟有好管閒事咁講價, 台灣朋友話一定要教育教育呢 D 唔講價既人 ~~ 之後到 EGV Metropolis City Bldg 食 lunch, 友人們話要食地道 D 既泰國野....辣完先可以返香港 =.="

坐的士到機場, 又覺得俾人搵左笨 ~ 不過算啦, 已經要走啦, 真係唔想再煩, 係機場 Mango Tree 再食 tea, 唔係太飽咁上機再食晚餐 終於返到香港 ~

Pattaya 呢個地方實在太唔好啦, 點解周街都係個 D 人同呢 D 人? 去完曼谷都係唔明點解 D 人可以買咁多野? 食野方面都唔錯, 大致上都好好食呀~ 唯一好就好在天氣唔錯, 一 D 都唔熱, 而最重要係可以一齊去旅行嘛 ~

今次呢個 trip 講左我呢世要講既普通話啦, 下次到你講廣東話 lor hahaa